Vizita Kortezia husi Diretor Rejionál ICAO Ázia-Pasífiku ba Autoridade Aviasaun Sivil Timor-Leste no Sua Excelénsia Ministru Transportes no Komunikasaun

Autoridade Aviasaun Sivil Timor-Leste, I.P. (AACTL, I.P.) ho honra informa katak Timor-Leste simu vizita importante husi delegasaun internasionál lidera husi Diretor Rejionál Organizasaun Aviasaun Sivil Internasionál (ICAO) ba Rejiaun Ázia-Pasífiku, Sr. Tao Ma, durante períodu 25 to’o 29 Maiu 2026.

Delegasaun ne’e kompostu mós husi Sr. Raju Shrestha, Ofisiál Tékniku no Peritu ICAO, no Sr. Sudhir Kumar Singh, Chief Technical Advisor ba programa COSCAP Southeast Asia, ne’ebé mai Timor-Leste tuir konvite husi Prezidenti AACTL, I.P., Sr. Zezinho António F. Gusmão, hanesan parte ida husi kooperasaun ne’ebé metin entre Timor-Leste no ICAO hanesan Estadu Membru.

Durante semana ida-ne’e, delegasaun mós akompaña husi Sr. Brendan Sobie, reprezentante husi programa EASA SCOPE (European Union Aviation Safety Agency), ne’ebé hala’o estudu kona-ba asesu ba merkadu, konektividade aérea no oportunidade dezenvolvimentu transporte aéreu entre Timor-Leste, ASEAN no merkadu internasionál sira.

Vizita ne’e organiza ba ekipa rua ho objetivu atu aumenta efisiénsia no rezultadu atividade sira. Ekipa dahuluk, lidera husi Sr. Tao Ma, foka ba enkontru no konsultasaun ho entidade governamentál relevantes, operadór aeroportu, kompanhia aérea nasional sira no parseiru dezenvolvimentu estratéjiku sira. Ekipa ne’e mós realiza enkontru ho reprezentante Governu Austrália no programa PROSIVU, ne’ebé durante ne’e fó apoiu importante ba dezenvolvimentu setor aviasaun sivil iha Timor-Leste.

Ekipa daruak, lidera husi Sr. Brendan Sobie, hala’o reuniaun ho stakeholder relevante sira iha setor aviasaun, turizmu no transporte, atu diskute kona-ba konektividade aérea, asesu ba merkadu internasionál no oportunidade atu aumenta movimentu pasajeiru no carga entre Timor-Leste no nasaun sira iha ASEAN no rejiaun seluk.

Momentu importante ida husi vizita ne’e mak enkontru kortezia ho Sua Excelénsia Ministru Transportes no Komunikasaun, Sr. Miguel Marques Gonçalves Manetelu, ne’ebé fó oportunidade ba parte rua atu troka hanoin no diskute kona-ba dezenvolvimentu setor aviasaun sivil iha Timor-Leste no oinsá apoiu no asisténsia husi ICAO bele kontribui ba fortalese kapasidade nasional hodi impulsiona kresimentu ekonomiku no dezenvolvimentu sosial nasaun nian.

Iha enkontru refere, Sr. Tao Ma aprezenta vizaun no objetivu husi programa ICAO COSCAP Southeast Asia, ne’ebé fó apoiu ba Estadu sira iha Rejiaun Ázia-Pasífiku, inklui Timor-Leste, atu fortalece seguransa operacional, seguridade aviasaun, kapasidade regulatória no sustentabilidade setor aviasaun sivil.

Iha nia intervensaun, Sr. Tao Ma subliña katak aviasaun mak motor importante ida ba dezenvolvimentu ekonomia moderna, tanba fasilita konektividade entre povu no merkadu sira, promove turizmu, atrai investimentu estranjeiru no kria oportunidade empregu ba sidadaun sira. Nia mós destaca importánsia atu Timor-Leste kontinua investe iha infraestrutura aeroportuária, dezenvolvimentu rekursu umanu no kapasidade institusionál atu bele aproveita benefísiu tomak husi setor transporte aéreu.

Durante diskusaun sira, parte sira aborda mós asuntu estratéjiku importante hanesan:

• Prioridade dezenvolvimentu setor aviasaun sivil Timor-Leste;
• Oportunidade atu explora apoiu tékniku no asisténsia ne’ebé ICAO bele fasilita ba Timor-Leste hanesan Estadu Membru;
• Planu modernizasaun no espansaun infraestrutura aeroportuária;
• Fortalesimentu kapasidade operadór aéreu nasional sira;
• Papel estratéjiku setor aviasaun nian iha apoiu ba kresimentu ekonomiku no integrasaun rejionál.

Iha nia intervensaun, Sua Excelénsia Ministru Miguel Marques Gonçalves Manetelu fó boas-vindas ba delegasaun ICAO no expresa nia apresiasaun ba apoiu kontinuadu ne’ebé ICAO fornese ba Timor-Leste durante tinan barak. Sua Excelénsia reafirma Governu nia kompromisu atu kontinua dezenvolve transporte aéreu ne’ebé modernu, seguru, eficiente no sustentável, hanesan pilar importante ida ba dezenvolvimentu nasional no integrasaun Timor-Leste iha rejiaun no mundu.

Sr. Tao Ma mós expresa nia apresiasaun ba Prezidenti AACTL, I.P., Sr. Zezinho António F. Gusmão, ba nia lideransa forte no kompromisu atu garante katak dezenvolvimentu setor Aviasaun Sivil Timor-Leste kontinua lao tuir padraun internasionál no pratika di’ak sira ne’ebé rekomenda husi ICAO.

AACTL, I.P. fiar katak vizita importante ida-ne’e sei fortalece tan relasaun kooperasaun entre Timor-Leste, ICAO, COSCAP Southeast Asia no parseiru dezenvolvimentu internasionál sira.

Kooperasaun ne’e sei kontribui ba dezenvolvimentu sustentável setor aviasaun sivil, hodi aumenta konektividade nasional no internasionál, promove kresimentu ekonomiku no fó benefísiu ba bem-estar sosial povu Timor-Leste.